پشکی شێری مینە چێنراوەکان وەبەر ڕۆژهەڵاتی کوردستان کەوتووە

NNSROJ: لە سەردەمی شەڕی ئێران و عێڕاقدا زیاتر لە ١٦ میلیۆن مین لە پارێزگا سنوورییەکانی ئێران چێنراون و لەم نێوەشدا ئیلام، کرماشان، ورمێ و سنەی ڕۆژهەڵاتی کوردستان، لە پاڵ خوزستان، پشکی شێری مینە چێنراوەکانی سەردەمی شەڕ و قۆناخەکانی دواتریان بەرکەوتووە.

بەرپرسانی ناوەندی هەڵگرتنەوەی مین لە ئێران دان بەوە دەنێن کە زیاتر لە ٢٨ هەزار هێکتار زەوی لەو پارێزگایانە هەیە کە هێستا لە مین پاک نەکراوەتەوە.

دەگوترێ کە لەدوای کۆتایی هاتنی شەڕی ئێران و عێڕاق، واتە لە ساڵی ١٣٦٨ی هەتاوییەوە تا ئەمڕۆ نزیک بە ١٠ هەزار کەس، لە ئاکامی تەقینەوەی میندا گیان یا پارچەیەک لە جەستەیان لەدەست داوە.

به گوێرەی لقی ئەندازیاریی وەزارەتی بەرگریی ئێران، تەنیا لە سەدا ١٠ی قوربانیانی تەقینەوەی مین لەم وڵاتە، چەکدار یا ئەندامانی تیمەکانی هەڵگرەوەی مینن و سەدا نەوەتی باقی، خەڵکی مەدەنین.

لایەنی دڵتەزێنتری مەسەلەکە لەوەدایە کە لە زۆربەی هەرەزۆری بنەماڵەی قوربانیان و بریندارانی تەقینەوەی مین، نەتەنیا قەرەبوو ناکرێنەوە بەڵکوو هەر بە تەواوی پشتگوێ دەخرێن.

بۆ وێنە، ئێوارەی رۆژی هەینی، ٢٦ی رەزبەری ٩٢، مینێکی چێنراو، لە نزیک کۆنە بنکەیەکی سپای پاسداران لە گوندی نشکاشی مەریوان تەقییەوە و لە ئاکامدا، حەوت مناڵ بە ناوەکانی “گەشبین کەریمی، ئاڵا رووبینا، مەتین رەخش بەهار، خەبات کەریمی، بێهنووش مینایی موقەدەم، زانا پاو و سینا دژاهەنگ”، بریندار بوون.[وێنەهەواڵ]

ڕۆژنامەی قانوون، چاپی تاران، دوو ساڵ پاش ڕووداوەکە، ڕاپۆرتێکی لەمبارەوە ئامادە کردووە و تێیدا لێدوانی لە بنەماڵەی چەند مناڵ، لە بریندارانی تەقینەوەکەی وەرگرتووە.

باوکی گەشبین کەریمی، ئەو کیژۆڵەی کە لەو تەقینەوەدا پاژنەی قاچی لەدەست دابوو، لەمبارەوە دەڵێ کە دوای تەقینەوەکە، جگە لە دەرمانکردنە سەرەتاییەکان، پارەی نەشتەرگەری و دەرمانکردنی کچەکەیان لە تاران لێ ئەستاندوون و سەرەڕای تێپەڕبوونی ٢ ساڵ، ئێستاش کەوشی تایبەتیان بۆ گەشبین دروست نەکردووە و ناچارن بەردەوام، بۆ گوازتنەوەی، کچەکەیان لەکۆڵ بکەن.

باوکی ئاڵاش لەمبارەوە دەڵێ کە کچەکەی چاوێکی لەدەست داوە بەڵام چ یارمەتییەکیان لە لایەن دەوڵەتەوە پێ نەگەیشتووە و خۆی بە داهاتی کرێکاری، ناچار بووە خەرج و مەخاریجی دەرمانکردنی کچەکەی بدات.

“حامید ڕاستبین”، ناوی مناڵێکی تری کوردە کە لە گوندێکی سەر سنووری باشوور و ڕۆژهەڵاتی کوردستان کەوتۆتە سەر مین و بریندار بووە بەڵام سەرەڕای بەدواداچوونی زۆر، پاسگای نزیک شوێنی تەقینەوەکە، تەنانەت قبووڵی ناکا کە لەو ناوچە تەقینەوەیەکی لەم چەشنە ڕووی دابێ چ بگا بەوەی کە دەوڵەت و ناوەندە پێوەندیدارەکان، قەرەبووی بنەماڵەکەی بکەنەوە.

ئەگەرچی بەرپرسانی ئێرانی بانگەشە دەکەن کە زۆربەی ناوچەکانی کوردستان لە مینی چێنراو پاککراوەتەوە بەڵام تەقینەوەی مین، نەتەنیا لە سەر سنوورەکان، بەڵکوو لە قووڵایی خاکی رۆژهەڵاتی کوردستانیش، ساڵانە دەیان کوژراو و برینداری لێ دەکەوێتەوە.

شایانی باسە هەر لەم چەند حەوتوویەی ڕابردوودا ١٢ کەس لە قەسری شیرینی سەر بە کرماشان و مێهرانی سەر بە ئیلامی ڕۆژهەڵاتی کوردستان، لە ئاکامی تەقینەوەی میندا گیان یا پارچەیەک لە جەستەیان لەدەست داوە.
م.م.