“برا لە پشت برا بێ، قەزا مەگەر لە لای خوا بێت”

دیمانە لەگەڵ ڕووداو: پەندێکی پێشینیان کە بە جوانی و ڕەوانی، شرۆڤەی پشتیوانیکردنی پارچەکانی کوردستان لە خەباتی یەکتری پێ دەکرێ. لەم ڕۆژانەی دواییدا گرووپێکی ئانلاین بە ناوی “هەڵمەتی پشتیوانی لە کوردانی باکوور”، هەڵمەتیکی خۆڕسک لەسەر تۆڕەکۆمەڵایەتییەکان دەستپێکرد و داوای لە خەڵکی ڕۆژهەڵاتی کوردستان کرد کە بە هەرچەشنێک دەتوانن پشتیوانیان لە خەباتی کوردانی باکوور نیشان بدەن و دژ بە کوردکوژی ئەردۆغان بوەستنەوە. هاووڵاتییان وەڵامی ئەرێنیان بە بانگەوازەکە دایەوە و پاشنیوەڕۆی پێنجشەممە، ٣ی بەفرانبار، لە چەند شاری ڕۆژهەڵاتی کوردستان وەک سنە، کرماشان، ئیلام، پاوە، سەقز و هتد و هەروەها لە بەر دەرگای باڵوێزخانەی تورکیا لە تاران و کۆنسووڵخانەی ئەو وڵاتە لە ورمێ چالاکیگەلێک بەڕێوەچوو بەڵام پۆلیس و هێزە ئاسایشییەکان دەستیان دەو چالاکییانە وەردا و بڵاوەیان بە خەڵک کرد و هەژمارێک خۆپێشاندەریشیان قۆڵبەست کرد و هەڕەشەی پێشوەختیان لە هەژمارێکی تریش کردبوو.

بەڵام هەرچۆنێک بێت، بێ لەبەرچاوگرتنی چەندایەتییەکەی، شەقام جووڵا و نیشانی دا کە مادام کورد نەتەوەیەکە، دەرد و ئازارەکانیشی یەکن. ئەوە سروشتیترین ڕێگەی دەربڕینی هاوخەمی و هاوسۆزییە لەگەڵ ئەو کەسانەی کە خۆ بە بەشێک لەو نەتەوە لەیەکدابڕاوە دەزانن بەڵام هەر بەدەر لەوەش، ئەوە ئەرکێکی ئەخلاقی و مرۆییە کە دژ بە قەتڵوعامی بەکۆمەڵی خەڵکی بێدیفاع و ژن و مناڵ هەڵوێست بگیردرێ. هەڵوێستی لەم چەشنە یەکێک لە کاردکردەکانی ناسیۆناڵیزمە، کە بێ گوێدان بە کات، سات، سنووری دەستکرد و مەودا، بێ لەبەرچاوگرتنی بەرژەوەندی تاکەکەسی، حیزبی و ناوچەیی، بەرانبەر بە هەر تەعدایەک دژ بە هاونیشتمانییەکەی، هاونەتەوەکەی هەڵوێست دەگرێ. هەر وەک چۆن دڵی ئێمە وەک مرۆڤ بۆ خەڵکی فلستین و ئاوارەکانی حەڵەب و برسییەکانی سوودان دەهەژێ، چ لەوە ئاساییتر نییە کە هەوڵ بدەین ناڕەزایەتی دەربڕین لە بەرانبەر ئەو زوڵمەی دەرحەق بە دراوسێکانمان، بە هاوزمانەکانمان لە چەند کیلۆمەتری سنوورە دەستکردەکانی ئێمە دەکرێ.

جووڵانی شەقام، شتێک نییە کە کۆماری ئیسلامیی ئێران حەزی پێبکات بۆیە کە خۆپێشاندان، لە ڕۆژهەڵات، بەزاندنی هێڵی سوورە، تەنانەت ئەگەر هیچ دروشمێک نەدرێت و هیچ لافیتەیەک بەرز نەکرێتەوە. بەو مەرجە خەڵک خۆی هاتبێتە شەقام، دەسەڵاتداران دەهەژێنێ. لە ڕۆژەکانی بەرزبوونەوە دەنگی هاوخەمی لەگەڵ کۆبانێ و ڕۆژئاوای کوردستان دیتمان کە چۆن هێزە ئاسایشییەکان و دەسەڵاتداران لە ڕۆژهەڵاتی کوردستان پەشۆکان و هەر کە زانیان ئەو حەڕەکەتە خۆڕسکە بەوان کۆنترۆڵ ناکرێ، دەستیان کرد بە قەدەخەکردن و ترساندن و تۆقاندنی دەستپێشخەران و بەشداربووان. دەیان کەس هەڕەشەیان لێکرا، هەژمارێک گیران و هەر ئێستاش گیراوانی ئەو خۆپێشاندانانە لە گرتووخانەدا ماون.

خۆپێشاندانی لەم چەشنە دەتوانێ پتەوترکردنی هەست و بیری نەتەوایەتی و هاوخەمی و هاوسۆزی، لێبکەوێتەوە، دڵگەرمی بەو خەباتکارانەی باکوور ببەخشێ کە بە دەستی بەتاڵ بەرانبەر بە سوپای تورکیا بوونەتەوە و جگە لەوە دەرفەت و پلاتفۆڕم بۆ دەربڕینی ناڕەزایەتیی خۆجێیش بخوڵقێنێ. هاوکات، دەنگدانەوەی میدیایی بابەتەکە، سەرنجی زیاتریی بیروڕای گشتیی جیهان بۆسەر ئاڵۆزییەکانی باکوور بە تایبەت و مەسەلەی کورد بەگشتی ڕادەکێشێ.

بۆ ئەو کەس، هێز و لایەنانەش کە بەردەوام هاوسۆزییەکی ئاوا دەخەنە ناو قاڵبێکی معامەلەییەوە، دەبێ بگوترێ کە کاتی مامەڵەکردن نییە، ئەمڕۆ هەڵوێست بنوێنە، سبەی کە وەزعەکە ئارام بۆوە بڕۆ داوای بەش بکە و مامەڵە لەسەر هەڵوێستی ئەمڕۆت بکە گەرچی خەڵک لە حیزبەکان ژیرترە، شەقام چاوەڕوانی حیزب ناکات، کۆمەڵگای ڕۆژهەڵات، کۆمەڵگای دەیەی پەنجا و شەست نییە و خۆی چ بە مەسڵەحەت بزانێ دەیکات. بەڵام سەرباری ئەمە، تا ئێستا پەکەکە یا هەدەپە داخوازییەکیان بۆ دەربڕینی پشتیوانییەکی تایبەت ئاڕاستەی حیزبی پارچەکانی دیکە نەکردووە بەڵام ئەگەر ئەحزابی کورد خۆیان بە نوێنەری بەشێک لەو نەتەوە دەزانن کە ناوی کوردە و دابەشکراوە، سروشتییە کە بێ بانگهێشتکران خۆیان هەوڵەکانیان بخەنەگەڕ و بۆ وێنە ئەگەر لەدەستیان دێت لە بواری دیپلۆماتیک، داوا لە تورکیا بکەن دەست لە کوشتاری کوردان هەڵگرێ و دیالۆگ لەگەڵ کوردان دەستپێبکاتەوە، ئەگەر بۆیان دەکرێ داوا لە ئەندامان و لایەنگرانیان بکەن کە پشتی باکوور بگرن، دەتوانن بە ئەندامانیان دەرەوەی وڵات بێژن کە بەشداری ڕێپێوانە جەماوەرییەکان دژ بە تورکیا بن و یا هەر نەبێ لێدوان بدەن یا دوو سێ پاڕاگراف بنووسن و بێژن کە ئێمە پشتی خەڵک دەگرین.

هەر چەشنە چالاکییەک و جووڵەیەکی سیاسیی مومکینە لە لایەن حکوومەتەوە بەلاڕێدا ببردرێ و هەوڵی چەواشەکردنی بدرێ بەڵام لە ڕۆژهەڵات، ناڕەزایەتی دەربڕینی لەم چەشنە هێڵی سوورن و دەزانن خەڵک ئەگەر هەست و سۆزی نەتەوەییان بۆ هاونیشتمانیانیان لە پارچەیەکی دیکە دەردەبڕن، بە هەمان چاویلکە لە دەسەڵاتدارانی ئێرانیش دەڕوانن و بۆیان بلوێ لەوە خراوتر بە کۆماری ئیسلامیی ئێران دەڵێن.
لە بولتەنی ڕۆژهەڵاتی ڕووداودا باسی بەشێک لەو باسانەم کرد.