مامۆستایەکی بەندکراوی پیرانشاری لە کۆما دایە

NNSROJ: گیراوێکی سیاسیی کورد، لە رۆژی شەممەوە لە حاڵەتی کۆما دایە و هەر ئێستا لە نەخۆشخانەیەکی زاهیدان لەژێر چاوەدێری پزیشکیدا بەسەر دەبات.

محەمەدئەمین ئاگووشی، مامۆستای خانەنشینکراوی پیرانشاری، رۆژی شەممە ١٩ی رێبەندان، لە بەندی گیراوانی سیاسیی گرتووخانەی زاهیدان، تووشی کۆما بوو و بە بێهۆشی بۆ نەخۆشخانەی گرتووخانەکە و پاشان بۆ نەخۆشخانەیەکی شاری زاهیدان گوازراوەتەوە.

سەرچاوەیەکی ئاگادار لە لێدوانێکدا بۆ چالاکانی مافی مرۆڤ و دێمۆکراسی لە ئێران، رەوشی تەندروستی ئەو گیراوە سیاسییەی بە “زۆر نالەبار” وەسف کردووە و وتوویەتی کە مەترسی مەرگی لەسەرە.

ئاگووشی کە پێشووتریش بەهۆی نەخۆشی دەماغ و لە ئاکامی گوێنەدانی بەرپرسانی گرتووخانە و دەرماننەکردنی، لانیکەم جارێکی تر تووشی کۆما بووە، زیاتر لە ساڵێکە بۆ گرتووخانەی زاهیدان، لە باشووری رۆژهەڵاتی ئێران دوور خراوەتەوە.

مەودای زاهیدان لەگەڵ پیرانشار، شوێنی لەدایکبوون و ژیانی محەمەدئەمین ئاگووشی، نزێک بە ٣٠٠٠ کیلۆمیترە.

ئەو مامۆستا خانەنشینکراوە، تەمەنی ٥٣ ساڵە و بە تۆمەتگەلێک وەک پێوەندی لەگەڵ ئەحزابی کورد و سیخوڕیکردن بۆ هەرێمی کوردستان، ٤ ساڵ لەمەوبەر، لە لایەن دادگایەکی سەربازیدا لە ورمێ، سزای تیربارانکردنی بەسەردا سەپابوو.

تۆمەتگەلێک کە بەردەوام رەتیکردۆتەوە دژ بە یاساکانی خۆی کۆماری ئیسلامیی ئێرانیشی لەقەڵەم داوە.

سزای تیربارانکردنی ئاگووشی، ساڵێک لەمەوبەر، بەهۆی نەبوونی بەڵگەی پێویست هەڵوەشایەوە و ئەو گیراوە سیاسیەش، پاش چوار ساڵ بەندکران لە گرتووخانەی “ورمێ”، لە مانگی گەلاوێژی ١٣٩١ی هەتاویدا بۆ زاهیدان دوورخرایەوە و دەبێ ١٠ ساڵ لەم شارە لە گرتووخانە دابێ.

محەمەدئەمین ئاگووشی، پاییزی ساڵی رابردوو، لەم گرتووخانەیەدا مانی لە خواردن گرت و پاشان نامەیەکی سەرئاوەڵای بۆ “بان کی موون”، سکرتێری گشتیی نەتەوە یەکگرتووەکان نووسیبوو.

ناوبراو بۆ سکرتێری گشتیی نەتەوە یەکگرتووەکانی باسکردبوو کە بێ تاوان گیراوە، ئەشکەنجە دراوە و بەو سزا قورسە مەحکووم کراوە.

ئاگووشی لە نامەکەیدا هەروەها ئاماژەی بەوە کردبوو کە یەکێک لە ئەندامانی بنەماڵەکەی، بۆ دابینکردنی تێچووی رێگای زاهیدان، گورچیلەیەکیان فرۆشتووە.
م.م.